Blog

20
Sep

煥然一新

Posted by | No Tags | Blog | No Comments on 煥然一新

換咗個新版嘅網頁,感覺煥然一新,襯返下個月新辦公室入伙,到時搞番個網上同埋實體店同步嘅grand openings! 睇返對上一篇blog, 仲係講緊啱啱買車,距離依家都有一年多啲,個仔都歲幾喇。 2016-2017年變化都好大(按時序發生): 1 man band 加入商會 戒咗煙(食咗17年) 買咗架車(Lpicture 廠車) 生左個仔 公司請咗人 Lpicture 獲選十大婚禮攝錄公司 買咗架哈利 再請多兩個人 更新Lpicture.com 搬新工作室 再請人 其實呢個大事回顧,喺一月就已經想做,不過一路都冇時間。我諗呢種齋talk唔做嘅陋習好多人都有,所以喺度分享下,有個Apps可能會幫到大家。 呢個app叫做奇妙清單,係一個to do list,好處係簡單易用,跨平台,可以合作,實際嘅用途係咁樣: 突然間諗起啲嘢想做,就即刻自己或者搵合作夥伴加個任務落去,可以指派邊個人去做,可以set個限期,可以加個筆記,附加圖片,甚至可以留言講下個進度,討論下。 搭車係電話睇到,做嘢喺電腦睇到,出街做嘢喺iPad睇到,做隻Shot都係靠佢。 希望大家都可以提升個執行力,祝大家心想事成! P.S. 完成任務剔咗佢會有叮一聲,記得校到最大聲!呢個算係我聽過最好聽嘅聲音之一!   下載連結: 6 Wunderkinder 的 奇妙清單 – 任務管理、項目規劃、購物清單

Read More
18
Sep

熱血爸爸的玩具

Posted by | No Tags | Blog | No Comments on 熱血爸爸的玩具

近排買咗部車,好開心,重拾兒時樂趣,掃把佬係good嘅。細個嘅時候揸WRX,大個咗揸Legacy旅行版,熱血爸爸,成熟穩重男仕之選。 但係今次想講買車背後嘅故事,部車其實係我送俾自己嘅戒煙禮物,呢十幾萬可能係我呢世人花得最啱,做得最正確既決定。 喺度我都想分享戒煙嘅想法: 好多人屋企有小朋友,就算有初生嬰兒都好,爸爸都可以繼續食,只要唔係兜口兜面噴佢,好似就冇乜嘢,實情當然唔係,大家都知無謂詳談。戒煙同屋企人扯上關係嘅切入點,係因為我想有多啲時間見到佢哋,我想我長命啲睇住個仔成長,參加我個仔嘅婚禮,我想我長命啲照顧我老婆,我唔想佢哋擔心,唔想成為包袱,唔想累街坊,我要健康,我要時間,我要老左嘅時間都仲係健康。 我做咗一個假設,假設我遇到30年後嘅我,佢話佢想要多啲時間,所以返嚟叫我唔好食煙,搵第啲嘢玩都好,不如試吓買部GT R ,Benz CLA 250 AMG,嗰啲都好好玩丫,唔好攞佢啲時間,佢條命來玩。 佢叫我試諗下,如果你病到得返幾個月命,果時有個醫生同佢講,你比40萬我,我比多一年時間你,你估你會唔會比?我諗就算我唔俾,我老婆都會俾,我老婆唔俾我個仔都會俾。但係而家你識得收手,用40萬買玩具,定係留返黎比醫生仲要辛苦?呢條數好易計。 我係接納左佢意見,不過冇買到GT R ,因為我對面個停車場好窄,GTR又好大部(其實我個銀包仲窄),但係我依家呢部,都有2500 CC Turbo,四輪驅動,一定夠我玩。 狂想mode: 如果CLA跌到15萬樓下就諗下啦…

Read More
18
Sep

拿~比d笑容喎~

Posted by | No Tags | Blog | No Comments on 拿~比d笑容喎~

  攝影師好有霸氣咁幫影婚紗相!影片來源:QUANG NGUYEN VAN YouTube#shebrides #婚紗相 Posted by shebrides on 2015年1月5日 呢條片我諗好多人都睇過,大家都笑得好大聲下~ :) 我都係。 不過其實係有野學架喎,冇錯就係轉angle 同一個角度, 係靚既, 影一百張你都只係會揀一張, 係唔靚既, 影三百張都唔會變返靚. 你地睇呢位c hing, d相應該幾豐富, 有石牆做前景, 有低炒羅d樹做background, 有遠有近, 壓縮野又有, 透視野又有, 最重要你地知唔知係咩? 係有笑容, 要令到比你影緊既人, 好自然咁笑, 唔係咁易架. 我見有好多行家都係, “拿比d笑容喎~”, “笑下~”, “好, 黎張笑既…” 你比個理由我笑先得架~ 咁只可以令人交一d皮笑肉不笑既牽強笑容, 唔係話唔work, 係會影到個笑容, 不過影唔出開心. 我多數都係用講下笑, 攪隻gag之類既手法, 同時捕住佢, 預測佢邊一句會笑, 有一套路幾work既: “我地黎個1號笑容, 2號, 再轉3號笑容, 好野全部係一樣既~ 哈哈~” 講到一半其實對焦構圖已經ready晒, 出埋尾果句就咔咔咔三張多數有收穫. […]

Read More
18
Sep

利是一大封 清潔好輕鬆

Posted by | No Tags | Blog | No Comments on 利是一大封 清潔好輕鬆

做婚禮攝影, 其中一個好重要既技能, 就係講好說話, 當中都有好大學問。 不過我地多數都會建議新人, 搵一位talk得下既, 夠聲既, 唔駛負責遞茶既姊妹, 負責對住貓紙讀, 好處有二: 我地攝影師講當然好樂意講, 亦都袋埋好多咩飲過新人茶,靚仔過劉德華呀, 飲深d賺多d,  之如此類既說話。不過現場收音既關係, 他日交條full version會聽到我地呢d老牛聲讀出黎, 而且對於當日既活動黎講, 攝影師始終係外人, 有得揀梗係揀返自己人, 仲要係女聲讀出黎好d. 我遇過一次, 企後面遞茶果位tea girl被安排要兼埋讀好說話, 結果大部分既敬茶相, 都影到呢位tea girl望住個茶盤上面既電話貓紙, 大煞風景。 亦都有新人會請大妗姐返黎包辦晒, 不過有好有唔好。因為佢地收得錢, 點都要做多d野, 好多時d時間比佢地玩晒去, 一陣又要全場比個beat佢聽佢唱打游詩。 大妗姐d好說話真係好層出不窮,有次老爺奶奶比利是對新人,大妗就話“拿~利是一大封,生活好輕鬆”,呢句確係妙!  

Read More
18
Sep

來生

Posted by | No Tags | Blog | No Comments on 來生

早排警界線大結局左之後,正諗緊下套劇會唔會接唔住個勢呢~ 呀原來呢套先算係神劇- 來生不做香港人 睇第一集已經有幾個位眼濕濕,上一代既人真係好苦,睇住艾威偷渡黎香港既情節,就好似話返比我知,我阿婆同阿媽係點樣黎香港既,我本身係仲有一個舅父,聽講好靚仔下既,就係係落黎既過程死左,因左黎香港,我阿媽連個細佬都冇埋。不過我諗現實中,再苦既故仔都有無數咁多~ “來生”入面d shot真係好靚,食粒藥都比返個jump水落杯既close up 先,誠意十足,土樓又好靚,真係想去下,其實我好似小學手冊入面,籍貫都係填東莞的,不過上到中學開始,都只係填返香港了… 另外我想講一下Hill少呢個角色,原名潘燦良,一路睇都覺得佢d戲真係好好,收放自如,不溫不火,恰到好處,但係唔去check下佢背景你都未必知,原來佢係做左舞台劇廿幾年既舞台王子,十幾年前開始,演南海十三郎入面既唐滌生原來就係佢。(我都曾經懶係文化友咁睇下呢d戲) 不過你唔係特登去搵資料,或者睇下動新聞,你可能仲會以為佢係新人添。 題外話: "我介紹我老母睇下呢套劇,佢話:"我知,而家個個都講緊,不過我來生都係想做香港人,所以冇睇⋯⋯"  

Read More
18
Sep

空櫈

Posted by | No Tags | Blog | No Comments on 空櫈

最近身邊有朋友既親戚過左身, 本身年紀都大, 事出突然, 走得都唔算痛苦, 不過最痛苦既, 都莫過於死者既老婆,老公走既時候一句說話都冇留低…   一齊生活左咁多年, 一齊經歷左咁多, 其實可以想像到其實係好難接受…   有時做婚宴影上茶,家族合照, 好多時都會遇到grand果代人只係須要預單數既櫈,大家做野都講效率,酒店姐姐即刻飛身埋黎抽起一張櫈,或者我以前都會快快手,但係諗深一層,個孫結婚係好開心既事,本身果張櫈係比,同呢位長輩一齊經歷左大半生既伴侶坐既,本身可以一齊見證呢d咁開心既事。   我經常會用比喻法黎想像,你諗下人生就好比一次旅行,本身你同你既情人環遊世界,其中一站book左係巴黎鐵塔上面食個燭光晚餐,點知你既情人未去到就已經瓜左,到你單拖上去食埋果餐既時候,你諗下應該會帶住咩心情? 如果係你,你望住張空櫈應該會有咩感覺~   以後我拎開果張空櫈既時候,我諗會感受到張櫈加埋當中故事既重量,動作放返慢d,show some respect…

Read More
18
Sep

醉漢人生

Posted by | No Tags | Blog | No Comments on 醉漢人生

有一個晚上座車的時候,聽到兩名醉漢的對話: 醉漢a: 拿你聽我講。 醉漢b: 係,我聽你講。 醉漢a:拿講真既,我識你咁多年。 醉漢b: 係,你識我咁多年。 醉漢a:你知我份人 醉漢b: 我梗係知…… 醉漢a:唔係唔係!你聽我講先! 醉漢b: 係,你講 醉漢a:做人既野,拿 醉漢b: …… 醉漢a:其實好__簡單,唔五味。好似你咁既年紀,有個女人會幫你蓋被,你唔舒服會問候下你。 醉漢b: 有陣時有又煩,冇又煩。 醉漢a:你聽我講,講真既,有個陪時時刻刻係身邊,呢個已經係一種能量。 聽到呢度,我諗起其實我屋企果個女人,其實一路都比緊能量我。 有時兩個人一齊得耐左,所有野都好似理所當然咁,但係唔好忘記,就算對方只係幫你下蓋被,問候一下,留係你身邊,其實已經係比緊一d能量你,令你繼續去衝。 呢兩個醉酒佬提醒左我,我老婆每日都向我輸出好高既能量! 如果各位都有人向你地提供緊能量,記得好好珍惜,同埋向佢輸出返更高既能量!你聽我講,講真既,唔五味!  

Read More
18
Sep

泰北之旅2015

Posted by | No Tags | Blog | No Comments on 泰北之旅2015

泰北之旅2015 啱啱飛完8日沖繩prewedding,  返香港唔夠4日又再飛泰北5日prewedding,  我老婆講笑話就黎唔記得我係咩樣,但係永遠都記得你笑到kaka聲果個樣。 今次去泰北其實有d探險feel,  我地去既地方, 係由清邁開3個鐘車, 經過七百幾隻灣後既深山小村, 叫做pai縣, 我估發音應該係啤牌個牌咁讀掛。 睇相果度有條小河, 有條小橋, 有d小屋, 小田小馬小樹咁上下, 係典型避世好地方, ramble唔想再打仗都係揀呢d地方黎避開阿上教, 但係阿上教集集都會坐直升機黎搵佢去拍第5,6,7,8,9滴血。 題外話: 我細細個已經覺得, 第一滴血既續集應該叫做第二滴血, 如此類推。 好喇飛機準備著陸, 今晚去搵下ramble傾傾, 睇下佢仲有冇血剩, 夠唔夠拍埋第一Lit血。  

Read More
18
Sep

朋友塊面污糟左, 你會唔會話佢知?

Posted by | No Tags | Blog | No Comments on 朋友塊面污糟左, 你會唔會話佢知?

朋友塊面污糟左, 你會唔會話佢知?   其實好明顯會丫~ 咁如果你朋友突左條好長既鼻毛出黎, 你又會唔會話佢知? 呢個就要諗下喇係咪? 咁如果你朋友處事唔係好對, 或者性格上你有野唔認同, 你又會唔會出聲? 你可能會怕佢嬲所以唔講, 或者”佢係咁架喇, 算啦~”就由得佢。 但係咁樣唔理佢, 同見到朋友塊面污糟左都唔出聲, 有咩分別? 除非你唔當佢朋友? 換返轉, 如果你塊面污糟左, 你想人地提提你話聲你知, 定係由得你? 識得我既人聽住, 我係好樂意聽到你地提提我的,做人胸襟廣闊d。 唔知你地又接唔接受到朋友既提點呢?   鄭重聲明, 呢個係我一直既想法, 唔好打黎問我, “喂, 你講緊我呀?”

Read More
18
Sep

Reboot

Posted by | No Tags | Blog | No Comments on Reboot

做左婚禮攝影師數載,第一次開始寫blog,令我諗返起細細個寫blog果陣既少男情懷。   當時仲係用緊28.8kps既modem,係geocities開左個acc,用Microsoft既front page黎寫,自我感覺都幾良好。   原來已經係十幾年前既事…   回想當初學攝影果陣,我問自己最想影乜野呢?   影到座山好靚,我比返座山睇?   影到隻貓好靚,我比返隻貓睇? (都可以既~)   紀錄人同感覺,我覺得係最有價值既,起碼當事人同我都會咁諗。   特別係婚禮。   婚姻乃係人生大事,唔會有take 2,果日發生既每一件事都係永恆,都係歷史,紀錄婚禮更加係責任更大,大到好似幫人接生咁,壓力係有,不過每日都係好開心既~   咁耐冇寫blog,第一篇唔好寫咁多野住,開大左個頭都唔知點算…去訓下先~

Read More